1 Timothy 3
3:1-13 Krais-nga Yambu-Talapema Nukungí Yima Kene ⸤Eninga⸥ Ambuma-Kene Mulungí Mele Ung Tale
3:1-7 Krais-nga Yambu-Talapemanga Tápu-Yima Mulungí Mele Ung Te
1“Yi te yu ‘Krais-nga yambu-talapeliinga tápu-yili molupu nukundu lem aima kapula.’ nimba piliilimú akili kongun aima kaí tondulale numanu monjulemú.” nirim yili-ni ung aima sika te nirim. 2Akiliinga, Krais-nga yambumanga tápu-yili molumba yili yu- yi aima sumbi-nili yi te molupa, yambuma-ni kanuku kis piliingí ulu te yu-kene naa pili yili mulupili.
Yu molupa konjupa, ulu kaíma mindi numanu kimbu-sipa,
- kimbu ki kangi numanu mélema waka kolupa temba mele mimi-sipa nokupa,
- yambuma-ni yu kanuku kaí piliiku yunga ungma liiku ai singí ulu kaíma mindi tepa,
- yunga lkuna ungí yambuma ‘Sukundu wai.’ nimba nokupa konjupa,
- ⸤Pulu Yili-nga ungma⸥ yambuma aima mimi-siku piliingí mele sumbi-sipa ung-bo tonjumba mele mimi-sipa piliipa,
3No nomba kelep naa topa,
yambuma-kene arerembi kolupa ele naa tepa,
yambuma-kene táka-nimba molupa,
ung-muranale numanu sipa temba yi te naa molupa,
ku-moni olandupa numanu naa munjupili.
4Yunga ambu kangambulama nokupa konjupa,
- yunga kangambulama yunga ungma táka-niku piliiku liiku, liiku ai siku mulungí mele mani sipili.
6Yi koela Krais-nga yi molumbále Krais-nga yambu-talapeliinga tápu-yi te naa mulupili. Aku-sipa yili tápu-yili molupa kene kara pumba kene Pulu Yili-ni ⸤kurumanga nuim⸥ depollale kot tenjipa “Kara purumeliinga mindili nani.” nirim mele yu aku-sipa temba kene kapula naa temba ⸤akiliinga ena puleliinga mele Krais-nga yili molupa numanu-bo pemba kene ‘Tápu-yili mulupili.’ niani.⸥
7Yu molumba mele ung te wasie nikerko. Tápu-yi molumba yili ulsu mulungí yambuma-ni yu kanuku kaí piliiku ‘Yu yi kaiéle.’ ningí yili mindi tápu-yili mulupili. Yu tápu-yili molumba kene ulsu molemele yambuma-ni “Yu yi kisele.” ningí kene ulsu-yambuma-ni niku kis-singí ungma ⸤kurumanga nuim⸥ depollale-ni liipa kene tápu-yilinga milu lemba kene yi kanili molupa kis-simba.
Te: 3:8-13 Krais-nga Yambu-Talapemanga Kongun Tinjili Yima Kene Ambuma Kene Mulungí Mele Ung Te (3:1-13 pali)
8Krais-nga yambu-talapeliinga kongun tinjili yi mulungíma enini kepe aku-siku mele molku konjangi:- Yambuma-ni enini kanuku kaí piliiku eninga ungma liiku ai-siku, ‘enini oliunga kongun tinjili yima mulúngi lem kapula.’ ningí uluma teku kene kongun tingíndu mimi-siku piliiku táka-niku tingí yima molku;
- numanuna ung lupa-lupama piliiku kerina ung lupa-lupama niku naa teku, yambu marendu ung lupa-lupama niku marendu alowa teku ung lupa-lupama niku naa teku;
- ‘⸤Krais-nga⸥ yambumanga kongun tenjipu kene ku-moni pulele liimbu.’ ningí yima naa molangi.
10Mulungí mele ui manda monjuku kanuku kene, enini molku konjuku, yambuma-ni kanuku kis piliingí ulu te enini-kene naa pípili mulúngi lem ‘⸤Krais-nga⸥ yambu-talapeliinga kongun tinjili yima molangi.’ ni.
11Ambuma kepe, aku-siku mele
yambuma-ni kanuku kis piliingí uluma naa teku,
- uluma tingí mele mimi-siku piliiku táka-niku teku mulungí ambuma molku,
molku konjuku, ulu kaíma mindi numanu kimbu-siku,
- eninga kongunuma mimi-siku piliiku teku kunjingí ambuma molangi.
yu ambu tilueliinga yili mindi mulupili.
- Yunga ambu kangambulama nokupa konjupa, yunga kangambulama yunga ungma táka-niku piliiku liiku, liiku ai siku mulungí mele mani sipa kunjupili.
3:14-16 Poll-ni Timoti Pepá Ili Topa Sirimeliinga Ung-Pulele
14Pepá ili nu simbundu topu molupu kene ‘Nu kanambu.’ nimbu ‘Nu molluna nondupa aima wambu.’ nimbu piliipu moliu. 15Akiliinga-pe ‘Ulu te-ni na pipi simba kene kapula nondupa naa ombúnje akiliinga’ nimbu kene ‘Pulu Yili-nga yambu molemelema teku mulungí mele piliani.’ nimbu pepá ili ui topu siker. Yambu akuma kona molupa mindi puli Pulu Yili-nga yambu-talapele. Yambu-talape akili ung-sikale liipa tapunjupa tondulu pupa pípili nilimú talapele. Ung-sika akili lkuli mele, Pulu Yili-nga yambu-talape akili ung-sikaliinga lku-paka-sum mele.3:16 Pulu Yili-nga Ulumanga Ulu-Pulele Aima Olandupaliinga Ung Te
16Ui Pulu Yili-nga ung te yu-ni mani sirim ung mo turumele ekupu mokeringa nimba para sirim ung akili-ni oliu Pulu Yili-nga yambuma molupu yu-ni kanupa kaí piliilimú uluma temulú mele liipa ora silimú ung akiliinga ulu-pulele aima tondulale, yambuma-ni ung akiliinga pulele manda toku mania naa mundungí. Ung-pulu akili i-sipa mele:Yu mana-yi te omba mokeringa mulurum.
Yu ulu-kaíma tepa molupa kunjurum mele
Minéle-ni liipa ora sirim.
Mulú-koleana angkellama-ni yu kanuring.
Yunga temanele ma-koleana pali
⸤yunga yambuma-ni⸥ toku silsiliiku anduring.
Yambuma temani kanili piliiku kene
‘Sika’ niku tondulu munduku piliiring.
Pulu Yili-ni yu mulú-koleana olandu liipa,
yu ui yi-tondulale mulurum kolea
tondulu talang púlina memba pupa munjurum.
Copyright information for
MUX